Xarici İşlər Nazirinin Azərbaycan Respublikası Milli Məclisinin Sədri ilə Görüşü   İran İslam Respublikasının Xarici İşlər Naziri, cənab Seyid Abbas Ərəqçi Bakıya rəsmi səfəri çərçivəsində Azərbaycan Respublikası Milli Məclisinin Sədri, Sahibə xanım Qafarova ilə görüş keçirmiş və ikitərəfli münasibətlər, regional və beynəlxalq proseslərlə bağlı geniş məzmunlu fikir mübadiləsi aparmışdır. Görüş zamanı cənab Ərəqçi İran İslam Respublikası ilə Azərbaycan Respublikası arasında dostluq və mehriban qonşuluq münasibətlərinin möhkəmləndirilməsində parlamentlərin əvəzsiz rolunu vurğulamışdır. O, iqtisadiyyat, ticarət, təhlükəsizlik, turizm, enerji, nəqliyyat və mədəniyyət sahələrində əməkdaşlığın daha da genişləndirilməsi istiqamətində İranın qətiyyətli iradəyə malik olduğunu qeyd etmiş, həmçinin ikitərəfli münasibətlərin müsbət inkişaf dinamikasını nəzərə alaraq qanunvericilik orqanlarının potensialından daha səmərəli şəkildə istifadə olunmasının zəruriliyini xüsusi qeyd etmişdir. Sahibə xanım Qafarova da Tehranın və Bakının əməkdaşlığın genişləndirilməsi istiqamətində əldə etdiyi irəliləyişlərdən məmnunluğunu ifadə etmişdir. O, birgə iqtisadi layihələrin hazırlanması və icrasının, habelə xalqlararası təmasların gücləndirilməsinin əlaqələrin möhkəmləndirilməsi baxımından mühüm əhəmiyyət daşıdığını bildirmişdir. Milli Məclis Sədri Azərbaycan parlamentinin İran İslam Şurası Məclisi ilə əməkdaşlığın inkişaf etdirilməsinə tam hazır olduğunu vurğulamışdır. Görüşdə, həmçinin, Azərbaycan-İran parlamentlərarası dostluq qrupunun sədri və üzvləri, eləcə də İran İslam Şurası Məclisinin Milli Təhlükəsizlik Komissiyasının üzvü Məhəmməd Rıza Möhsini iştirak etmişlər. Tərəflər parlamentlərarası əməkdaşlığın genişləndirilməsi, xüsusilə iki Məclisin ixtisaslaşmış komissiyaları və dostluq qrupları arasında təmasların intensivləşdirilməsi istiqamətində fikir mübadiləsi aparmışlar. Məhəmməd Rıza Möhsini parlament diplomatiyasının artan əhəmiyyətini vurğulayaraq, İran İslam Şurası Məclisinin Azərbaycan Milli Məclisi ilə məsləhətləşmələri və qarşılıqlı əməkdaşlığı gücləndirməyə hazır olduğunu bildirmişdir.