İran XİN başçısının müavini cənab Vəhid Cəlalzadə Bakıda mətbuat konfransı keçirib   23 yanvar 2026-cı il, Bakı – İran İslam Respublikasının xarici işlər nazirinin konsulluq və parlament məsələləri üzrə müavini cənab Vəhid Cəlalzadə Azərbaycana rəsmi səfəri çərçivəsində yerli media nümayəndələri üçün geniş brifinq keçirmişdir. Nazir müavini çıxışında İranda baş vermiş son iğtişaşları və terror fəaliyyətlərini şərh edərək, bu hadisələrin sionist rejim və ABŞ-ın hərbi təcavüz strategiyasının tərkib hissəsi olduğunu vurğulamışdır. O bildirmişdir ki, məlum xarici qüvvələr mülki etirazlardan sui-istifadə etməklə terror aktları vasitəsilə İrana qarşı hərbi təcavüz üçün zəmin yaratmağa ümid edirdilər. Lakin milyonlarla insanın dövlətə dəstək məqsədilə nümayiş etdirdiyi birlik bu planı iflasa uğradıb.   Vəhid Cəlalzadə qonşu dövlətlərin nümayiş etdirdiyi konstruktiv mövqeyi realist və son illərdə bəzi ölkələrdə xarici müdaxilələrin acı təcrübələrinə əsaslanan yanaşma kimi dəyərləndirib. O vurğulayıb ki, beynəlxalq hüquqa zidd bu cür müdaxilələrin mənfi nəticələri yalnız həmin ölkələrin sərhədləri ilə məhdudlaşmır, eyni zamanda ətraf ölkə və regionlara da sirayət edir. İkitərəfli əlaqələrə toxunan nazir müavini, Bakı və Tehran arasında münasibətlərin artan xətt üzrə inkişafından məmnunluğunu ifadə etmişdir. O, yaxın perspektivdə yüksək səviyyəli siyasi-iqtisadi nümayəndə heyətlərinin mübadiləsi, strateji iqtisadi layihələrin icrası və mədəniyyət sahəsində təmasların intensivləşdirilməsi üzrə planların mövcudluğunu qeyd etmişdir. O, həmçinin vurğulamışdır ki, region dövlətləri mövcud təhdidlərin miqyasını düzgün təhlil edərək, ABŞ rəhbərliyini bu risklər barədə məlumatlandırıblar. Onun qənaətinə görə, məhz regional səviyyədə nümayiş etdirilən bu preventiv yanaşma müharibə riskinin minimallaşdırılmasına mühüm töhfə vermişdir. Cənubi Qafqazdakı regional proseslərə toxunan Cəlalzadə, İran İslam Respublikasının son 30 il ərzində dəyişməz qalan prinsipial mövqeyini bir daha xatırlatmışdır. O, Qarabağın Azərbaycan Respublikasının suveren ərazisi olduğunu və Tehranın münaqişənin sülh yolu ilə həllinə hər zaman tərəfdar çıxdığını vurğulamışdır. Nazir müavini rəsmi Tehranın Azərbaycan və Ermənistan arasındakı sülh prosesini tam dəstəklədiyini bəyan edərək, regionda davamlı sabitliyin bərqərar olmasının bütün bölgə dövlətlərinin fundamental maraqlarına xidmət edəcəyini, iqtisadi tərəqqiyə və xalqların rifahının yüksəlməsinə həlledici töhfə verəcəyini qeyd etmişdir.