Vəhid Cəlalzadə ilə Ceyhun Bayramov arasında fikir mübadiləsi aparılıb

Vəhid Cəlalzadə ilə Ceyhun Bayramov arasında fikir mübadiləsi aparılıb

Cümə günü, 23 yanvar tarixində İran İslam Respublikasının xarici işlər nazirinin müavini cənab Vəhid Cəlalzadə Bakıya səfəri çərçivəsində Azərbaycan Respublikasının xarici işlər naziri cənab Ceyhun Bayramov ilə görüşüb. Görüş əsnasında tərəflər arasında ikitərəfli əməkdaşlıq gündəliyində duran aktual məsələlər, bölgədəki mövcud vəziyyət və qarşılıqlı maraq doğuran regional mövzular ətrafında fikir mübadiləsi aparılmışdır.

Cənab Cəlalzadə görüş zamanı İrandakı son proseslər barədə ətraflı məlumat verərək, iğtişaşçıların törətdiyi əməllərə toxunmuşdur. O, baş vermiş hadisələr nəticəsində 300-dən çox asayiş keşikçisinin şəhid olduğunu, bir sıra ibadət evləri və təhsil müəssisələrinin vandalizm aktlarına məruz qaldığını diqqətə çatdırmışdır. Nazir müavini xüsusi olaraq vurğulamışdır ki, bu fəaliyyətlər xaricdən, xüsusilə ABŞ və İsrail tərəfindən koordinasiya olunan və məqsədli şəkildə idarə edilən təxribat xarakteri daşımışdır. O, bu müdaxilələrin əsas hədəfinin ölkədə qeyri-sabitlik yaratmaq, vətəndaşların canına və mülkiyyətinə xələl gətirmək olduğunu bəyan etmişdir.

Nazir Ceyhun Bayramov öz növbəsində Azərbaycan Respublikasının beynəlxalq hüququn təməl prinsiplərinə, o cümlədən dövlətlərin suverenliyi, ərazi bütövlüyü və daxili işlərinə müdaxilə edilməməsi öhdəliklərinə sadiqliyini ifadə etmişdir. Görüşdə qonşu ölkədə daxili sabitliyin təmin olunmasının regionda davamlı sülh və təhlükəsizlik baxımından əhəmiyyəti vurğulanmış, bu xüsusda Azərbaycanın dəstəyi diqqətə çatdırılmışdır.

Eyni zamanda, tərəflər iqtisadi-ticari əlaqələrin, nəqliyyat-kommunikasiya xətlərinin və strateji əhəmiyyətli tranzit dəhlizlərinin inkişaf etdirilməsi üzrə əməkdaşlığın perspektivlərini nəzərdən keçirmişlər. İkitərəfli münasibətlərin mehriban qonşuluq, qarşılıqlı hörmət və ortaq maraqlar prinsipləri əsasında dərinləşdirilməsinin vacibliyi bir daha təsdiq olunmuşdur.