İran İslam Respublikası və Azərbaycan Respublikası Arasında İqtisadi Əməkdaşlığın Dərinləşdirilməsi Perspektivləri müzakirə olunub

İran İslam Respublikası və Azərbaycan Respublikası Arasında İqtisadi Əməkdaşlığın Dərinləşdirilməsi Perspektivləri müzakirə olunub

İran İslam Respublikasının Xarici İşlər Naziri, cənab Seyid Abbas Ərəqçi Bakı şəhərinə rəsmi səfəri çərçivəsində Azərbaycan Respublikası Baş Nazirinin müavini və İqtisadi Əməkdaşlıq üzrə Birgə Komissiyanın Azərbaycan tərəfindən həmsədri cənab Şahin Mustafayev ilə görüş keçirmişdir.

Görüş zamanı tərəflər iki ölkə arasında ikitərəfli münasibətlərin mövcud vəziyyətini ətraflı şəkildə nəzərdən keçirmiş, iqtisadi, ticarət, nəqliyyat və sərhəd bağlantıları da daxil olmaqla müxtəlif sahələr üzrə əməkdaşlığın daha da genişləndirilməsi imkanlarını müzakirə etmişlər.

Cənab Şahin Mustafayev İran və Azərbaycanın dərin tarixi, mədəni və insani bağlılıqlarına toxunaraq qeyd etmişdir ki, iki ölkə Prezidentləri arasında əldə olunmuş razılaşmaların sistemli və ardıcıl şəkildə icrası qarşılıqlı əməkdaşlığın yeni mərhələyə yüksəldilməsi baxımından xüsusi əhəmiyyət daşıyır. O, aviareyslərin sayının artırılmasını və sərhəd zonalarında həyata keçirilən layihələrin sürətləndirilməsini İran Prezidentinin Bakıya son səfərinin əməli nəticələri kimi dəyərləndirmiş, həmçinin son bir il ərzində İrana etdiyi üç səfərin Azərbaycanın iqtisadi və ticarət sahələrində əməkdaşlığı inkişaf etdirməkdəki qətiyyətinin göstəricisi olduğunu vurğulamışdır.

Cənab Seyid Abbas Ərəqçi Azərbaycan Respublikasının yüksək səviyyəli rəsmiləri ilə apardığı səmərəli və dərin məzmunlu danışıqların iqtisadi əməkdaşlığın müxtəlif istiqamətlərində — xüsusən də nəqliyyat-tranzit xətləri, enerji, su ehtiyatları, mədəniyyət və turizm sahələrində yeni imkanların açılmasına xidmət edəcəyinə ümidvar olduğunu bildirmişdir. O, Birgə İqtisadi Komissiyanın fəaliyyətini yüksək qiymətləndirərək, mövcud razılaşmaların effektiv təqibinin və sərhəd bölgələrinin iqtisadi potensialından daha səmərəli şəkildə istifadənin zəruriliyini xüsusi vurğulamışdır.